သူများတွေလို အလျှံပယ်အောင် မထားနိုင်ပေမယ့် မကြောင့်ကြရအောင် လူတန်းစေ့စေ့ ရပ်တည်စေနိုင်ခဲ့ပြီး ပညာတတ်တစ်ယောက်ဖြစ်အောင် ပျိုးထောင်ပေးခဲ့တဲ့ အဖေ့မေတ္တာကိုလည်း ကျွန်တော် ခံစားမိပါတယ် အဖေ။
အဖေရေ ကျွန်တော်က သားမိုက်တစ်ယောက် မဟုတ်ပေမယ့် သားလိမ္မာတစ်ယောက်လဲ မဟုတ်ခဲ့ဘူးနော်။ အဖေ့မျှော်လင့်ချက်တွေ အဖေ့အိပ်မက်တွေကိုလည်း အခါခါ ရိုက်ချိုးခဲ့မိတယ်။ ကိုယ်ဖြစ်ချင်တာ တစ်ခုတည်း သိပြီး အဖေ့ကို ၀န်ထုပ်ဝန်ပိုးလည်း ဖြစ်စေခဲ့တယ်။ အဖေ ပေးဆပ်ခဲ့သလောက် ကျွန်တော့်အလှည့်မှာ တာဝန် မကျေနိုင်သေးပါဘူး အဖေ။
အဖေရေ အလုပ်ပင်ပမ်းလို့ ဖြစ်ဖြစ်။ ဘ၀အမောတွေကြောင့် ခွန်အားတွေ ပျောက်နေတဲ့အခါပဲ ဖြစ်ဖြစ် ဒီကဗျာလေးကို ဖတ်ကြည့်ပါ။ အဖေ့ကို နားလည်မှုမရှိဘူးလို့ အဖေထင်တဲ့ သားတစ်ယောက်ရဲ့ ရင်ထဲက စကားတွေကို အဖေ့နှလုံးသားက ကြားနိုင်ပါစေ အဖေ.....။
သို့..ဖေဖေ
(၁)
အဖေ...
မွေးစကနေ၊ ဒီအရွယ်အထိ
သားတို့ကို ရှာဖွေကျွေး...
လိုသမျှ ပေးခဲ့တယ်နော်......။
(၂)
မျှော်လင့်ချက်တွေ တစ်ပုံတစ်ခေါင်း
မေတ္တာရေသွန်းလောင်းလို့...
လူရာဝင်ရေး၊ ပညာအမွေပေးတဲ့
အဖေ့စေတနာ.....
ကျွန်တော် နားလည်ပါတယ်..အဖေ..။
(၃)
တစ်ခါ တစ်ခါမှာ....
အဖေ့ မျှော်လင့်ချက်တွေကို ရိုက်ချိုး
ကျွန်တော် ဆိုးမိတော့လည်း....
အပြစ်မယူ..မငြူစူပဲ...
ကြည်ဖြူစွာ ပေးဆပ်..အပြုံးမပျက်တဲ့..အဖေ....။
(၄)
နေပူပူ..မိုးသည်းသည်း..
နှင်းဖွဲဖွဲကျလည်း...
ဝတ္တရား မပျက်၊ ငွေရှာထွက်လို့..
မိသားစု အရေး၊ အမြဲပဲ တွေးနေတတ်တဲ့..အဖေ.....။
(၅)
အလုပ်ခွင်မှာ၊ စိတ်မရွှင်စရာ ..
ဘယ်လောက်ကြုံကြုံ...
အချိန်တန်လို့၊ အိမ်အပြန်မှာ...
မိသားစုကို သောကမပွားစေဘဲ....
မြိုသိပ်ထားတတ်တဲ့....အဖေ..။
(၆)
အဖေ့...သမီးကြီးလောက်...
ဂုဏ်မမြောက်တဲ့...
သိုးမည်းလေး ကျွန်တော့်ကို...
တစ်ခါ တစ်ခါ..
ဂရုဏာဒေါသနဲ့ ဆူပူတတ်တဲ့ .. အဖေ..။
(၇)
အဖေ....
အဖေ့အလှည့်မှာ.....
ကျွန်တော့်ကို ပေးဆပ်ခဲ့ပေမယ့်...
ကျွန်တော့်အလှည့်မှာ..
တာဝန်မကျေနိုင်သေးတဲ့..
အဖေ့သားကဗျာငှက်ကလေး...
ဒီစာကို အဖေ့အတွက်ရေးလိုက်ပါတယ်......။
(၈)
အဖေ့အတွက်...
အမောပြေစေတဲ့..ရေတစ်ခွက်မဖြစ်ရင်တောင်....
ချွေးသိပ်ပေးမယ့်...မိုးပေါက်လေး တပေါက်အဖြစ်
အဖေ...မှတ်ယူ....ကြည်ဖြူနိုင်ပါစေ.....။
No comments:
Post a Comment